❤️旅行x美食❤️法國餐廳。Brasserie 9

 

成個泰國之旅10餐有8餐都係食泰國菜或者地道小食~~去旅行緊係食當地野架啦！！唔通返香港先黎食泰國菜咩？咁點解無啦啦會係泰國食法國菜呢？其實係因為避雨XD

 

大家都知曼谷一落雨就sa一聲落好大，咁我地上左船去緊Asiatique，突然間就落勁大雨！到左碼頭落船都無收細！好在我呢個雨傘怪，不論陰晴，袋入面都一定有把傘！但太大雨大家都走得好狼狽。。。因為行程嘅原故，我地都好肚餓，落船前就有共識去到見到邊間餐廳就入邊間避雨兼晚膳~~呢間餐廳係正碼頭落船位置，所以我地就入左去~~

 

餐廳客人以外國人為主，睇裝潢都知道唔係平價餐廳，打開menu先知原來係法國餐廳，雖然唔係食泰國菜，但坐低左就無謂走啦~~睇睇下menu好多野都想食，都唔知揀咩好，所以上網睇下會唔會有網民食過又有推薦啦~~ 估唔到大家對餐廳評價都幾好喎，網上評分有4.5分/5~~

 

*餐飲*

 

Tonight or Never [TB$250] ♥ 主要有青蘋果、菠蘿汁、青檸汁。。酸酸地又有點薄荷味。。都幾好味~~

 

Framboise Kiss [TB$250] ♥ 主要材料係紅桑子、蘋果汁、菠蘿汁。。但極似藥水味！！好難飲>_<

 

*餐湯*

 

 

Lobsterbisque [TB$380] ♥ 龍蝦湯我一直都無太大興趣，因為香港一般餐廳飲嘅都好咸，又無龍蝦，都唔知飲緊咩。。但呢個龍蝦湯就令我改觀！味道濃郁但不至於過咸，有龍蝦嘅鮮甜味，仲有龍蝦肉，不錯~~

 

送的麵包亦夠鬆軟~~

 

 

*前菜*

 

Mussels Mariniere [TB$540] ♥ 由白酒、蔥蒜、牛油烹調嘅青口，份量不少，青口大隻鮮甜！我自己本身好鍾意食貝殼類，所以我就食埋人地果份XD

 

 

*主菜*

 

Pork tenderloin with tapenade, Pernod kingprawn with ratatouille and baby tomatoes [TB$680] ♥ 呢道菜係睇完網上評價而點嘅~~果然豬肉煮得剛剛好！不會太乾太硬~~ 大蝦亦彈牙，但係得一隻，每人只能分到一啖。。。至於配菜我就唔識欣賞。。我本身就唔鍾意D口感軟腍腍嘅蔬菜，重點係我唔食茄子。。所以食左一啖就無食過。。。

 

*甜品*

 

The Last Dance [TB$300] ♥ 心太軟 雲呢拿雪糕 朱古力艾菲爾鐵塔~~作為朱古力迷就緊係心心眼啦~~好味就好味不過太飽都食唔晒。。。

 

整體黎講，食物質素不錯，環境舒適，有空間感，很適合情侶用膳！連10%服務費 7%稅，盛惠TB$2824.8，即係大約HK$624~~ 法國餐呢個價錢都合理~

 

 

更重要係我地誤打誤撞咁享用左浪漫嘅一餐♥~

 

Facebook page: Kelly Discovery

Instagram:Kelly Discovery